Celebrities News

Marf新歌《TXT or CALL》刻劃現代戀愛態度 打造Jeffrey變bad boy

By Wonmin

18 June 2024


女團COLLAR成員Marf邱彥筒,昨日(17日)推出年度首支個人單曲《TXT or CALL》,內容講述一對處於曖昧狀態的男女,不過男方對女方態度卻忽冷忽熱,對女方訊息時而回覆,時而不回覆,令對方感覺「囉囉攣」,刻劃出現今社會部分男女的戀愛態度……為了迎合歌曲主題,Marf更親自邀請好友Jeffrey魏浚笙擔任MV男主角,期間Jeffrey更一反固有的陽光男孩形象,演繹對另一半忽冷忽熱的「bad boy」角色!

Marf與Jeffrey同為時尚品牌寵兒,二人不時雙雙出席活動,不過論到拍MV,二人卻是首次合作。問到Marf為何會邀請Jeffrey做今次MV男主角?她表示:「之前為品牌一齊影相,見到我哋出嚟效果好有趣,同Jeffrey同框擺埋一齊,有啲唔夾、又有啲夾嘅感覺;加上佢天生麗質,為我首歌嘅主題有好貼切嘅代入感,可以做好典型嘅『bad boy』,其實本身想搵佢做啲斯文男仔,但佢話造型上想有啲改變。」身旁Jeffrey聞言即沒好氣笑言:「佢話題材好適合,話我似『bad boy』!」

首次飾演「bad boy」的Jeffrey戴上唇環造型野性,大呼今次角色非常好玩:「演『bad boy』形象好爽,Feel到個勢投入角色,好新鮮。」Jeffrey續說,MV中的角色完美演繹「欲拒還迎」:「呢招男仔用係屈機,通常女仔都會囉囉攣。」Jeffrey問到Marf若跟對象暖昧中,會喜歡對方 TXT 定 CALL她,Marf指:「梗係揀Call,忽然打畀我,係會有啲緊張,不過我寧願係咁,聽到聲係最真實。」此外,Marf透露今年焦點會集中團隊為主,個人上預計會出兩首單飛歌曲。

而MV中,Marf除了以多個造型示人外,亦「瞓身」吊威也倒吊上陣,Marf指:「我同導演有共識營造 fall with someone (愛上人)感覺,用威也倒吊來呈現係最靚,導演有問我想唔想玩?怕唔怕辛苦?我話好呀,我唔介意辛苦,倒吊反轉點都得,最鍾意吊威也,感覺好正,想吊多幾次,倒吊時腦充血嘅感覺好熱血,好正。」

BY Wonmin

18 June 2024