張致恒（Steven）與太太雯雯2019年結婚後育有3子，不過雯雯自去年開始就不時係社交平台表示要離婚，網友更封她做「離婚界KOL」。不過講足一年二人未有離婚，日前雯雯係IG開「你問我答」，逐一回應網友嘅問題。

網友嘅問題都相當尖銳，例如有人留言問曾見到佢同steven係商場行街，二人路途上都有講有笑，問到二人目前嘅關係，雯雯就話一直趕唔走對方，「賴死喺度，又一毫子都冇，又懶！」仲反問網友如有無辦法可以令佢離開嘅MSG可以告知。有人講到二人關係去到咁，如果靜靜地搬走分居2年離婚，雯雯表示，「間屋我租，點解我要走。」至於目前嘅經濟狀況，一個月要幾多先夠用，佢就回應要2-3萬先夠養育3個小朋友同愛犬。

其他網友睇完雯雯又講家事「四圍唱」似乎有啲厭倦，認為「一隻手掌拍唔響」，既然知道另一半零責任心，生完第一胎後就唔應該繼續生，不過都係嗰句家家有本難念的經。