2019年同粉絲雯雯奉子成婚嘅張致恆（Steven），二人婚後育有三子！而佢地近年不時傳出婚變，雯雯鬧爆老公唔返工搵錢好「廢」，自己要獨自負擔3子同愛犬嘅生活費，唔少網友都勸雯雯離婚，不過佢就認為離婚解決唔到問題。日前雯雯再係IG出po，但今次唔再係「怨氣po」，反而係透露同老公坐低傾過問題，更暗示自己懷第4胎！

雯雯透露今次係IG最後一個po係一個總結，佢表示呢一年好多事情改變，係人生一個轉捩點。過去雯雯以為做人好簡單，只要認為只要相信和堅持有好結果，但現實卻是相反，「一次又一次嘅被背叛同傷害，確實令到我思想同性格都改變晒，好似一次又一次，加重仇恨咁。」至於同Steven嘅關係佢就話無信心可修補，「但係呢一刻我相信大家都需要時間去行落去，講到尾其實根本唔關共唔共患難事，如果係咁嘅，我諗一開始根本唔係咁樣行。」

令到雯雯突然咁感觸係因為同大仔有關，佢話自覺仔仔開始懂事，仔仔每次見到自己喊嘅時候會擔心同唔開心，「我就同自己講要醒，唔能夠影響小朋友成長，唔能夠帶比佢有任何陰影。」同時佢就透露之後有個手術要做，風險好大感到害怕，「上天要帶我走，所以同自己講好向前行，好好珍惜同家人嘅時間，仲好過喺度發癲，日日喺度鬧都根本改變唔到好多嘢，亦都冇幫助。」

最後雯雯再寫下一段疑似懷上第4胎嘅句子，表示既然上天再一次俾咁樣嘅安排，就應該好好計劃同靠自己去照顧，「再一次負起呢個責任，迎接呢份禮物同安排。無謂再去浪費氣力，同時間只係喺度發洩同埋鬧，我相信唔放棄，堅持一定有出路，瞓醒一覺，又會係一個好嘅開始。」