Celebrities News

黃智雯公布做蔡少芬、朱茵師妹 樂觀迎挑戰

By Wonmin

3 January 2024


上月約滿離巢無綫的黃智雯(Mandy),宣布正式加盟「凱藝娛樂」,成為神級花旦朱茵與Ada蔡少芬的同門師妹,日前Mandy為新一年拍攝造型照,對於加盟新公司大叫興奮,表示抱正面開放態度,迎接新挑戰。

踏入2024年,Mandy即有新動向,回首過去的2023年,對她來說的確是特別的一年,成為人妻,身份改變,亦因這個身份變化,令她深感要展開人生的新階段,她說:「好想突破自己,跳出框架,嘗試一啲以前未試過嘅嘢!好多人問我係咪會去演多啲舞台劇,當然舞台劇喺我呢兩年嘗試後,畀到我另一種滿足感,我都想繼續開拓舞台劇上嘅自己,不過我覺得自己有更加多可能性,好想同多啲唔同嘅演員合作,多啲火花,對電影、綜藝節目、真人騷等所有嘢抱開放態度,以樂觀、開放,迎接新挑戰!」

加盟新公司,跟朱茵與Ada蔡少芬作為同門,Mandy笑言跟她們早有淵源:「佢哋兩位真心係我好欣賞嘅藝人、女神,其實我哋三個不約而同有相同之處,我同Ada都係Miss HK出道,佢係我師姐,朱茵就係我演藝學院嘅師姐,所以我哋有啲淵源;佢哋又係偶像派,又係女神,非常期待將來我哋可以有更加多合作火花。」問到朱茵與Ada貴為美魔女、神級花旦,作為她們的同門師妹,可有壓力?Mandy說:「好大壓力,點解佢哋兩個可以keep得咁好、咁靚,我自己都要繼續努力學跳舞同唱歌,令自己更fit,keep更好狀況。」

老公姊妹給予支持老公和好姊妹對於Mandy的新動向亦給予支持,她指:「另一半好支持自己,一步一步走來,佢沿途都畀好多意見,我覺得佢係一個好聰明嘅人,成日都會幫我分析,亦係好好嘅聆聽者及心靈伙伴;而姊妹們更加係唔使多講,我哋姊妹間無論大家有咩決定、有咩去向,都會在心中互相支持。」此外,有網民對於Mandy早前「離巢」感傷感一事,Mandy感激所有支持她的人:「唔使傷感,我仲喺度,好多謝大家喺社交平台留言支持及祝福,每一留言我都有睇,好感動。」

BY Wonmin

3 January 2024