Celebrities News

馬志威收藏過千件大褸 鍾意長髮多過短髮

By Wonmin

7 May 2023


昇陽娛樂型男馬志威跟同門師弟Kenji范麒智,齊齊出席時尚品牌活動,雖然同是時尚品牌的寵兒,但二人毫無芥蒂,馬志威更大讚小師弟Kenji靚仔兼有禮,他說:「我哋成日都見,Kenji好有禮貌,而且係好努力年輕人,之前佢開電影《無名指》,我都有同佢分享演戲心得,知佢都做得好好、好放,希望佢嚟緊可以有不同嘅發機會。」

馬志威自言對時裝有一種偏愛,他認為時裝可呈現人的個性,閒時會花不少時間及金錢去鑽研,他透露最瘋狂時家中曾收藏過千件大褸:「真係好鍾意買嘢,衫、鞋、傢俬、花樽咩都啱,如果屋企太多嘢,我會送啲畀朋友,又或者捐畀有需要嘅人,不過而家年紀大咗,購物嘅瘋狂程度亦減咗。」

問到馬志威有何新工作?他指即將會開拍一套劇集,因為角色需要而留長頭髮,他謂:「第一次留咁長頭髮,自己鍾意長頭髮多過短髮,其實長頭髮都唔難打理,只要吹乾頭紮起便可以,長髮嘅造型可以好多變,For Fashion嚟講,我鍾意長頭髮。」

BY Wonmin

7 May 2023