Celebrities News

王智騫夏日Look大晒飛毛腿 爆Kenji多女埋身

By Wonmin

2 May 2024


昇陽娛樂「小鮮肉」Martin王智騫與Kenji范麒智出席時尚品牌活動,期間二人更以夏日短褲造型示人,當中范麒智更變身「飛毛腿」,他們坦言自己鮮以短褲出活動示人。

近年Martin與Kenji頻頻孖住搵真銀,最近二人更以「BL」組合衝出香港到台灣出席時尚活動,在台灣日對夜對,二人笑言對對方生厭,Martin笑說:「本來喺香港都唔覺,但係去到台灣就真係feel到少少。其實我好期待大家一齊去嘗試唔同嘅新挑戰,因為好多默契就係長時間相處先產生到。」Kenji則指:「喺香港我哋平時無論做嘢定係去健身都會一齊,所以都好慣一齊。但去到外地,我反而需要啲時間自己獨處一下,感受下一個人嘅空間。」

問到二人經常行孖咇,會否減少認識異性的機會?Martin即向Kenji派「高帽」表示:「反而多咗喎,我發現企喺Kenji 隔離,佢太靚仔,好多時會有異性問攞IG,好似上次去新加坡咁,喺一個food festival 度進行拍攝,突然間就有一班女仔衝過嚟問佢攞IG。」Kenji就指自己平時出街不會化妝整頭,相反,同Martin出街,他會注重少少形象,較多打扮,所以亦多了異性認識的機會。

BY Wonmin

2 May 2024