Celebrities News

容祖兒公開保養秘訣 靠媽咪出手抗鼻敏儲健康

By Wonmin

12 May 2023


樂壇天后容祖兒(Joey)最近為「位元堂」皇牌產品「野生蟲草皇強肺通」擔任星級代言人,日前祖兒化身健康大使拍攝廣告,期間大方分享獨門養生秘訣,又透露全靠容媽媽一雙巧手超前部署,為她儲備健康資產,迎接人生黃金期。疫情放緩,Joey回歸空中飛人生活,加上早前忙於籌備《Eternity 容祖兒演唱會》,可謂忙上加忙!不過Joey仍然元氣滿滿,她笑言保養秘笈相當簡單:「做運動之餘亦要配合飲食,我哋成日都話『You are what you eat』(人如其食),所以一定要食一啲對身體有益嘅產品;另外,我最鍾意飲薏米水,因為可以去水腫。」

提到鼻敏感成為現代人的文明病,尤其季節交替最易發病,Joey表示全賴「私家看護」——容媽媽貼身照顧,助她時刻保持最佳狀態:「轉天氣、或者空氣污濁,我先會出現流鼻水同鼻敏感症狀,所以我嘅身體都算唔錯!全靠媽咪幫手,因為佢咁多年嚟都會燉冬蟲草同舞茸畀我食,令到我嘅身體好似儲錢咁,不知不覺間累積咗好多抵抗力。」

臨近母親節,孝順女Joey雖然注重儀式感,但更想以行動慰勞容媽媽:「媽咪同我好似,我哋唔係過時過節就要送大禮嘅人,不過每一年我都會送花畀佢,因為我覺得無女人唔鍾意收花,哈哈!其實唔只母親節,我希望媽咪每一日都有強健體魄,因為我依家會喺唔同嘅地方開騷,好想佢可以親眼見證,所以一定要身體健康!比起買靚衫畀佢,我更著重佢嘅健康同埋抵抗力,亦都會喺呢方面花心思。」

與歌迷的七月之約暌違六年,Joey將於七月回歸香港演藝學院舉行演唱會,談到與樂迷的「秘密約會」,Joey表現相當興奮:「好開心我嘅演出可以分成兩個不同系列,分別係紅館同埋2017年開發嘅『Secret Live』,後者同觀眾嘅距離更加近,我亦都會獻唱一啲Side track歌曲,但係反應一樣好好!所以咁多年嚟都有朋友問我會唔會舉行Part 2,我都考慮咗一段時間,覺得今年係一個幾好嘅時機,可以同我嘅歌迷進行秘密約會。」

BY Wonmin

12 May 2023