Entertainment

【財閥家的小兒子】宋仲基人設萬中無一 李星民魅力搞到嘟姐勁冧

By Barbara

23 November 2022


星級韓迷嘟姐(鄭裕玲)又有好推介!Viu Original原創奇幻韓劇《財閥家的小兒子》首播叫好叫座,第三集收視更突破雙位數字,在一眾韓劇新作中一枝獨秀!昨日(22日)嘟姐也在電台節目《口水多過浪花》提到近日尤其關注《財閥家的小兒子》,不但大讚男神玉樹臨風,還自爆特別鍾情性格演員李星民,對劇集讚不絕口!

童顏宋仲基扮學生無違和

由「韓流男神」宋仲基夥拍「百想影帝」李星民和「氣質女星」申鉉彬主演的Viu Original原創奇幻韓劇《財閥家的小兒子》掀起全城熱話,向來走在煲劇最前線的嘟姐也緊貼這股韓風,大讚男主角宋仲基人設「萬中無一」:「屋企環境相當唔錯,而且靚靚仔仔,去到中學、大學甚至係校草,成績好、體育好,仲考入知名大學!」

正當余德丞表示宋仲基打得又睇得之時,嘟姐竟自爆過去未曾收看他的作品,直至《財閥家的小兒子》為二人牽起緣份:「雖然我冇睇過佢嘅戲,但係我喺MAMA頒獎禮見過佢真人,的確係玉樹臨風!不過唔知點解一直冇吸引到我睇佢嘅作品,直至呢套;而宋仲基好嘢嘅地方就係,佢今年都37歲,但係佢可以扮大學生喎,你唔會覺得佢扮𡃁仔!依家播咗三集,佢嘅野心已經出咗嚟、有晒部署,淨係睇演技我都覺得好睇!」

李星民演技出眾壓倒全場劇中飾演順洋集團大家長陳養喆,李星民向來演技非凡,更囊括百想視帝、影帝,以及大鐘獎最佳男主角等多項獎座,就連嘟姐也點名大讚對方實力出眾:「劇中另一個好主要嘅演員我都好鍾意,就係李星民,只要有佢出現嘅劇集,佢都會盡力做,而佢嘅角色亦都非常有魅力。李星民喺第一集最尾出場,佢無講過一句說話,但係嗰種攝人嘅魅力,會令你覺得『有呢個演員喺度就掂喇!』」此外,嘟姐亦劇透該劇雲集一眾韓劇熟面孔,「除咗佢兩位之外,好多角色都係韓劇熟客,又係好演技,所以真係好好睇!」

BY Barbara

23 November 2022