「宅男女神」蘇皓兒Chloe向來是廣告商的寵兒，日前她為信用卡廣告進行拍攝，Chloe放下女神形象，以多個挈大口大叫「嘩」的造型上陣，表情誇張惹笑，喜感十足！

Chloe表示為了今次拍攝，她挈大口拍足12小時：「今次廣告係偏向日系浮誇表情嘅廣告，同以往拍廣告嘅風格好唔同，最初收到通知知道廣告概念時，都驚自己handle得唔夠好，最驚觀眾唔認得自己，好彩最後出嚟效果好好，甚至有觀眾DM我，話呢個風格好趣怪，好適合我添！」

• 

• 

想試搞笑角色拍攝之前，Chloe在家苦練「嘩」的表情，務求每個鏡頭的表情一致，而向來鮮有拍喜劇的她，對於今次初嚐搞笑角色，感覺新鮮，她還表示希望可以參與喜劇演出，她謂：「我好少拍喜劇，希望自己可以涉獵唔同類型嘅角色，包括喜劇，因為自己都冇乜包袱，所以好想嘗試下。」