Netflix運動真人騷節目《體能之巔：百人大挑戰》上週播出大結局後，最後冠軍獎項落在混合健身選手禹秦熔，奪走3億韓幣獎金！日前韓國論壇就指出節目製作組疑將賽果造假，雖然Netflix同節目製作人有立即發出聲明否認事件，但最後亞軍鄭海民決定公開受訪，言論立即引起網民熱議！

亞軍鄭海民之後受訪時透露了當時最後一關拉繩比賽所有過程，表示對手禹秦熔因音響問題先後兩次要求暫停，到第三次則係因爲節目組突然叫停拍攝，表示錄唔到音而暫停比賽。他表示當時拉出嘅繩子比對手起碼多3倍，「我當時已經無力，所以拒絕重新比賽，節目組又強調情況對我有利，仲話表示公平可以先剪走我已經拉出嘅繩，之後繼續拍攝。」

但最後恢復拍攝，究竟製作組有無剪走到已經拉出嘅繩，鄭海民表示無從得知，即係有好大機會佢係由頭拉過。佢表示當時重新拍攝未知因爲真係無力定設備問題，繩子一直拉唔出，「我同節目組講可唔可以播我成個過程，佢哋嘅回覆竟然係話參賽者唔可以干預剪接。」鄭海民強調公開講出過程唔係因爲想攻擊禹秦熔，而只係覺得作為運動員，希望節目組可以播出成個比賽，而唔係只單獨播佢失敗嘅過程。