每年的叱咤樂壇頒獎禮總是觀眾最期待的頒獎禮之一，編輯跟大家一樣都懷著極興奮的心情觀看，當看見P1X3L奪得生力軍組合銅獎時開心不已！他們初出道時不被看好，曾被笑一個似芝娃娃、一個似河豚、一個似泰國B L劇。但這一年都在默默耕耘地做好音樂、做好每一個綜藝節目，由《大海男兒》、主持《囝囝女女730》、客串Error的《自肥企画》，7師傅的《7救星》、到《香港秘密搜查官》，每次都出盡全力去做，網民也紛紛由負評到支持他們，如今終於達成上叱咤頒獎台的夢想，為求追夢，「就算跌崩一隻牙齒」又如何？
從《全民造星II》誕生，由Phoebus 吳啟洋、George歐鎮灝及Marco葉振弘組成的男團P1X3L，讀音像Puzzle，「我們似一幅拼圖，因為我們三個都很凹凸不平，要靠對方不同的長處去彌補不足。當我們各有不足的時候，三個走在一起就會變成一幅拼圖出來。」如果你常常看ViuTV，就會發現在以組合 P1X3L 出道前，他們 3 人已經於 ViuTV 綜藝節目《大海男兒》合作，他們在節目裡咬緊牙關完成一個又一個看得讓人心驚的任務，而格仔mike導當時也初次出鏡於幕前。
出道初期不被看好
在意網民意見
雖然出道初期不被網民看好，但3個熱愛演藝事業的年輕男生，沒有放棄繼續主持綜藝節目和參與劇集演出，先前更在《7救星》中有亮眼表現，三人為Fans在天台跳唱的一幕打動人心，實力表現馬上令不少觀眾刮目相看，其後隨即以OMG名義推出《Oh My 7 God》；而他們也一直有留意網民的留言。
Marco：「非常在意呀，因為網民對我嘅讚美係永遠都唔會吝嗇，所以我都好愛網民，大家即管講更多我哋嘅嘢，關於我哋 P1X3L 嘅嘢，我愛你哋。」
Phoebus：「如果評語上面不論好壞我都會睇嘅，我覺得最緊要幫到我哋嘅我都會去睇。」
George：「我發覺香港人啲留言係好具創意性，話我哋三個似咩呢？一個似芝娃娃、一個似河豚、一個似泰國B L劇，我想講係普通人諗唔到嘅嘢嚟嘅，即係好難會想像一個人似隻狗㗎嘛，佢話我似隻狗嘅時候，我覺得：呢條友有創意，正！我哋需要學習佢嘅創意，應該係佢哋嚟導我哋點樣拍好嘅綜藝節目。」
Marco：「啱呀！其實網民比好多意見我哋拍好多嘢㗎。」
Phoebus：「即係下次你就扮芝娃娃？」
George：「係喇，仲要係憤怒嘅芝娃娃。(笑)」
講講對方的優點或缺點？
拍攝當日，編輯對三子的感覺都很好，他們都是編輯見過的明星之中最沒有偶包、說話最率真的藝人。Phoebus真人比鏡頭上更充滿魅力，George 說話直率、Marco有禮乖巧又幽默。三人都各有著不同的性格，有優點也有缺點。
Marco：「Phoebus嘅優點就係太高，變咗可以拉高我哋嘅平均身高，咁George就係比較隨和，同佢好難鬧交，就算鬧佢，都唔會鬧翻你。」
George：「都係嘅，因為你都未踩到我底線。」
Marco：「即刻踩踩先啦，喂，講你底線嚟聽吓啦。」
George：「我底線好低。」
Phoebus：「我覺得Marco嘅優點太多喇，我講佢缺點啦，缺點就係成日太早到，永遠可能約7點佢會6點9或者6點半就到，搞到我準時都好似遲到咁。」
George：「我覺得係佢哋身上嘅缺點係，例如Phoebus唱歌太好聽，Marco跳舞太好睇，咁我就喺佢身上都學到嘢嘅。」
新歌 〈Just Lean On Me〉
P1X3L 出道作 〈Braceless〉是一首輕快的跳舞歌，歌詞鼓勵大家不必隨波逐流，最重要是要有自己的態度。最新推出新歌《Just Lean On Me》以暢快淋漓的舞曲喚醒大家體內的青春熱血，進一步鼓勵大家掙開枷鎖，同時讓大家見證他們的蛻變。
George：「〈Just Lean On Me〉呢首歌係我哋三個一齊諗出嚟嘅主題，係講關於自由，我哋年紀可能會有好多枷鎖擺咗喺我哋身上，但係呢首歌正正就講到係充滿着希望嘅，一開頭首歌係冇乜希望，但係去到最尾你會feel到，其實好多嘢只要你勤力啲、堅持，跟住撥一撥開就有希望之光喺度。」
Phoebus：「咁我哋第一首歌Braceless就係講唔好隨波逐流，唔好怕痛。我哋第二首歌個意思都係好正面，都想俾多啲正能量俾大家，唔好怕逆境同埋困難，可以掙開枷鎖，爭取自己想要嘅嘢，可能係自由又好，你渴望嘅嘢或者其他乜嘢都好，主要係宣傳我哋3個都係正能量。」
Marco：「正 能 量，「樣」 」
George：「做咩呀？」
Phoebus：「做咩呀你？」
Marco：「講笑！講笑！ 」
而其實歌曲很久前已經錄好，不過他們都覺得可以做得更加好，公司也破例讓他們重新再錄過，大家都想做出好作品。
堅持總會有發光的一天
在叱咤樂壇頒獎禮之前，他們甚至沒有出席記招的機會，也曾說過早已知道得獎的機會不大，到今日能夠得到新力軍獎，相信他們想都沒有想過。正如新歌 〈Just Lean On Me〉一樣，只要堅持就會有發光發亮的一天。從一開始被網民笑：「一個似芝娃娃、一個似河豚、一個似泰國B L劇。」
到現在網民在新歌Youtube上留言：「雖然唔可以話係你地嘅粉絲，但係好欣賞你地既努力同進步。尤其大海男兒嘅演出。加油呀！祝你地有更多作品帶比大家！」、「Omgggg，今次首歌真係好好聽，等咗mv好耐，真係冇令人失望， 一定loop爆!!! I love Phoebus、I love Marco 、I love George、I love P1X3L。」、「欣賞你哋果團火！Just lean on me~~~真係好洗腦，每個音準亦都好啱三位成員，亦都明顯見到你哋無論係唱歌或者跳舞方面都有進步。加油！Btw，今次Marco個頭好咗好多。」、「To P1X3L：原本講真好小留意你地，但係當你地係IG講自己好想去頒獎禮就開始留意你地，開始睇大海男兒、香港秘密，覺得你三個好博命，支持你地～希望你地明年今日一定比現在好，更多人認識。」
P1X3L接下來即將參演新劇《i.Swim》，Phoebus也即將有一個關於聲音，考驗聽覺的全新綜藝節目，就讓我們一起期待他們更多亮眼的作品吧！P1X3L，你們值得擁有更多！
GUEST/ P1X3L (Phoebus, George, Marco)
DIRECTION & PHOTOGRAPHER/ Issac Lam
STYLING & CONTENT EDITOR/ Hazel Leung
MAKE UP/ Matt Li @Wo_Pavilion
HAIR/ Vince Pang @ IL COLPO
VIDEOGRAPHER/ Dave, Casper
EDITORIAL ASSISTANT/ Kiu Pang, Kary Leung
GRAPHIC DESIGN/ Verna Poon
