{ LIFESTYLE }
13 Mar 2018
港產片其實好好睇!重溫歷屆金像獎最佳電影



好多人成日話港產片唔好睇、唔入流,但其實大家近幾年又睇過幾多套港產片?不如先了解、欣賞,唔喜歡嘅再批判都未遲。而家就嚟重溫返歷年得過金像獎嘅「最佳電影」,揀套今個週末嚟睇睇,或者可以令你對港產片另眼相看。


《樹大招風》



由近至遠講返,《樹大招風》最特別嘅地方係,以三位導演許學文、歐文傑、黃偉傑嘅角度出發,分別拍攝三位歷代三大賊王嘅犯罪經歷。三位賊王分別由林家棟、任賢齊、陳小春領銜主演,而林家棟更憑藉季正雄一角得到當屆影帝添!



你可能智話香港大把呢啲警匪片,但以往不少同類電影都係以警方角度出發。但《樹大招風》反而從三個賊王嘅心態轉變嚟做主線,「賊王亦只係時代下嘅人物」,若然一般鎗林彈雨嘅警匪片唔啱你,可以選擇《樹大招風》嚟睇睇~


《桃姐》



係呢個冷漠嘅香港,係需要《桃姐》呢套戲嚟溫暖一下大家。電影講述一位生長於大家庭嘅少爺Roger與自幼照顧自己長大嘅家傭媽桃姐之間所發生嘅一段溫暖人心嘅主僕情故事。



一整套電影落嚟雖然看似平淡無太大起伏,但正正可以睇得出導演許鞍華細膩嘅情感安排。睇完戲,你會有種淡淡然嘅溫暖,亦有種失落,個種失落令你反思有幾耐無真正陪過家人?《桃姐》出色嘅地方就係能喚醒你對家人嘅愛。


《少林足球》





星爺嘅笑片相信都陪住唔少香港人成長!但原來仔細留意,《少林足球》係歷年「最佳電影」唯一嘅喜劇類電影!《少林足球》講咩其實都唔需要多作解釋,週末想嚟到輕鬆電影嘅話,不妨重溫一下大力金鋼腿吖!


《女人四十》



同樣由許鞍華導演嘅《女人四十》亦非常適合一眾女士觀看~講到《女人四十》有幾叻的話,佢係首部香港電影金像獎實現大滿貫,即係同時包下最佳電影、導演、編劇以及男、女主角嘅戲!



電影主要講述港一個典型嘅職業婦女係面對更年期煩惱嘅同時,又點樣係家庭以及事業之間爭取平衡?電影當中有非常多寫實嘅情節,亦探討好多女性問題。雖然電影係1995年上映,但即使嚟到2018,依然都會得到大家嘅共鳴。



睇完過往嘅精彩回顧,又唔知今年嘅最佳電影會花落誰家呢?嚟緊第37屆香港電影金像獎將於四月十五日舉行,大家記住密切留意!


Source:hongkongfilmawards;電影劇照

YOU MAY ALSO LIKE
News
Feature
Blog
02 Sep 2018
Load more
 
NOTIFICATION